O Ministerio de Fomento presentará antes de que termine xuño un plan de reestruturación operativa “moi potente” en 17 aeroportos da rede para solucionar o “importante desaxuste entre a oferta e a demanda” que presentan estas instalacións. O seu obxectivo é aforrar no gasto do seu funcionamento, o que implicará a revisión de horarios e de categorías profesionais.
Avanzouno así a ministra de Fomento, Ana Pastor, quen explicou que se realizarán este tipo de actuacións en 17 aeroportos de menos de 500.000 pasaxeiros, para pasar de 2.000 horas a 708,9 horas abertos operativamente. Pastor puxo como exemplo que algúns dos aeroportos da rede de Aena inician a súa actividade moitas horas antes do primeiro voo e horas despois de que aterre o último.
A titular de Fomento tamén indicou que traballa en reestruturar Renfe e os servizos que presta co fin de que a operadora pública gañe eficiencia e garantir a súa viabilidade. “Renfe é unha gran compañía, pero necesita gañar eficiencia para garantir a súa viabilidade”, asegurou a ministra. A titular de Fomento lembrou que a operadora ferroviaria pública recibe anualmente subvencións públicas por importe duns 400 millóns de euros, en tanto que mantén servizos que apenas contan con viaxeiros. Entre eles, citou os trens hoteis que prestan servizos nocturnos internacionais e que, segundo xa apuntou Renfe, estúdanse suprimir.
