A mostra está formada por máis de 300 libros e varios vídeos a través dos cales se tenta dar a coñecer todo o que rodea a Ruta Xacobea, segundo informa o Diario de Noticas. A encargada do albergue de Torres do Río, Carmen Pugliese, foi unha das impulsoras desta exposición. “A idea xurdiu porque vin que os peregrinos que chegaban a aquí non tiñan moita oferta de cousas para facer na localidade. Ademais tamén me dei conta de que moitos fan o Camiño de Santiago pero non saben moito acerca del”, explicou. Pugliese decidiu expor ao público os numerosos libros que ten no seu domicilio e ademais púxose en contacto con varias asociacións relacionadas co camiño que doaron material.
O lugar escollido para instalar a mostra que permanecerá aberta ata outubro foi unha parte do albergue que non tiña utilidade algunha. “Habemos ido adecuando esta zona e cuns paneis que construímos logramos pór todos os libros ao alcance dos visitantes. Desta forma, os peregrinos poden vir consultar os libros e mesmo teñen un televisor para poder ver vídeos”, asegurou Pugliese. Na recentemente inaugurada exposición, pódense contemplar documentos escritos en once idiomas diferentes: eúscaro, catalán, galego, castelán, portugués, francés, inglés, italiano, aleman, noruegués e mesmo en xaponés.
