Un albergue do Camiño de Santiago en Navarra é atendido por discapacitados intelectuais

• Autor: Por mediatrader
• Data de publicación: Mércores, 13deXullode2005

Máis de 400 peregrinos pasaron xa polo albergue da localidade navarra de Estella, situado na ruta do Camiño de Santiago, desde que abriu as súas portas o pasado 1 de xuño. A peculiaridade deste albergue é que é xestionado na súa totalidade por persoas con discapacidade intelectual. Encárganse de realizar as tarefas de recepción dos peregrinos, inscrición, preparación da credencial e orientación pola localidade.

Esta iniciativa, que xurdiu o ano pasado, ten dous obxectivos. O primeiro é dar unha oportunidade de emprego a estes discapacitados e, o segundo, sensibilizar á sociedade, xa que coa súa integración laboral “conséguese dar unha visión moi positiva da discapacidade”, explica a responsable do albergue, Natalia Zarranz. Neste sentido, Zarranz sinala que, á parte das tarefas que xa desempeñan estas persoas, están a exporse a idea de crear postos de traballo estables para a limpeza do local.

Actualmente, e co fin de poder manter o horario de apertura previsto e continuar co proxecto, a Asociación Navarra en Favor das Persoas con Discapacidade (ANFAS), impulsora da iniciativa, busca voluntarios que apoien aos discapacitados no seu labor de administración do albergue, que permanecerá aberto ata o próximo 30 de setembro.