O Euribor pechou xaneiro no 1,232%, tras situar a súa taxa diaria na última xornada hábil do mes no 1,225%. Desta forma, o indicador máis utilizado para o cálculo de hipotecas volve á senda baixista, ao retroceder unha centésima con respecto ao índice marcado en decembro, que foi do 1,242%. O dato, que confirmará o Banco de España nos próximos días, tradúcese nun abaratamento das hipotecas contratadas hai un ano que se revisen en febreiro de aproximadamente 100 euros.
Tras comezar xaneiro por encima do 1,25%, o Euribor mantivo ao longo do mes unha evolución á baixa e perdeu unha décima cada semana, ata pechar no 1,232%, lonxe do 2,622% que marcaba o indicador en xaneiro de 2009. A taxa de xaneiro non desmente as previsións dos analistas, que a situaban nesta referencia e é previsible que non rexistre grandes variacións ata que o Banco Central Europeo (BCE) suba os tipos de interese, actualmente no 1%.
Co Euribor ao 1,232%, unha hipoteca media de 150.000 euros contratada en xaneiro de 2009, cun prazo de amortización de 25 anos, reducirá nuns 100 euros as súas cotas mensuais ou 1.200 euros ao ano.
