O mercado inmobiliario español atópase nun momento de desaceleración que se traduce nun menor volume de compra de vivenda, o incremento no período de venda dunha casa, e a diminución dos seus prezos. Así se desprende de dous estudos elaborados por senllas empresas de intermediación inmobiliaria, en consonancia cos últimos datos estatísticos da vivenda, e nos que se pon de manifesto que o tempo transcorrido ata que finalmente o propietario consegue vender a súa casa é cada vez máis amplo, en especial canto máis cara sexa. Ao mesmo tempo, diminúen os prezos iniciais, e durante este verán un 10% dos pisos de segunda man rebaixou o seu prezo polo menos 3.000 euros. Unha tendencia máis acusada en determinadas comunidades autónomas como Madrid, Valencia e Cataluña, co 12,4%, 10,9% e 10,7%, respectivamente.
Menos demanda
Os propietarios dunha vivenda en venda tardan máis en dar “saída” á súa casa. Esta tendencia, que os interesados puideron xa comprobar, ratifícaa o “Informe sobre o Mercado da Vivenda”, onde se subliña que a media de días transcorridos entre a saída ao mercado e a venda da vivenda para todas as poboacións seleccionadas aumentou en 18 días de media, pasando dos 94 días que se tardaba no primeiro semestre de 2006, a 112 días no primeiro semestre de 2007. Este dato parece apuntar unha certa diminución da presión da demanda no mercado inmobiliario español.
A localidade onde menos días se necesitaron para vender un inmoble durante o primeiro semestre de 2007, en concreto, 74, é Bilbao. No polo contrario atópase Valladolid, cuxa media se situou en 133 días. En Madrid e Barcelona, necesitáronse no período analizado 111 e 103 días, respectivamente, para lograr que fura adquirida unha vivenda posta en venda.
Prezos estancados
Case ao mesmo ritmo que diminúe a venda de vivendas, redúcese tamén a taxa de crecemento do prezo por metro cadrado. Entre o primeiro semestre de 2006 e o primeiro semestre de 2007 esta taxa foi do 5,4%, unha cifra moi por baixo do 16,8%, taxa de entre o primeiro semestre de 2005 e o primeiro semestre de 2006. Esta cifra parece confirmar a desaceleración no crecemento dos prezos da vivenda de segunda man en España nos últimos doce meses.
A taxa de crecemento do prezo por metro cadrado diminuíu en once puntos respecto ao exercicio anterior
Actualmente, o catro cidades con prezos máis elevados por metro cadrado no primeiro semestre deste ano son Barcelona (4.481 euros), Madrid (4.413 euros), L’Hospitalet de Llobregat (3.710 euros) e Bilbao (3.693 euros). Estes prezos son case o dobre dos prezos por metro cadrado de cidades como Málaga, Sevilla, Valencia ou Valladolid. En xeral, e coas únicas excepcións de Alacante, Córdoba e Jerez de la Frontera, o prezo por metro cadrado é superior nas vivendas máis pequenas (as que teñen menos de 70 metros cadrados) que nas de maior superficie (aquelas con unha área maior a 70 metros cadrados). O efecto dun metro cadrado adicional reduce o prezo por metro cadrado, confirmando así a evidencia de maiores prezos por metro cadrado nas vivendas máis pequenas.
Máis hipotecas subscritas por estranxeiros
Ademais de diminuír o número de vendas, tamén parece diminuir o de compradores nacionais. Así, a proporción de solicitantes de hipotecas de nacionalidade española diminuíu en 3,67 puntos porcentuais no último ano, ata situarse no 63,47% do total de compradores de vivenda de segunda man en España.
Crece, con todo, a proporción e cidadáns estranxeiros que subscriben unha hipoteca e adquiren unha vivenda de segunda man. Os cidadáns ecuatorianos (9,8%) son os principais compradores estranxeiros, seguidos dos marroquís (4,4%), os romaneses (3,2%) e os colombianos (2,5%). O importe medio da hipoteca é superior entre os cidadáns americanos (210.563 euros), e as persoas procedentes de Asia (215.625 euros) que entre os compradores africanos (167.892 euros) e europeos (179.641 euros). Ademais, os europeos hipotécanse por unha cantidade menor respecto ao valor do inmoble (83,8%), e por un prazo lixeiramente inferior (36 anos) respecto ao resto de nacionalidades.
Español, cunha idade comprendida entre 25 e 35 anos, con estudos primarios, contrato indefinido, salario inferior a 1.500 euros, solteiro, e que decide compartir a súa casa con alguén máis. este é o perfil do comprador medio de vivenda de segunda man en España, segundo o “Informe sobre o Mercado da Vivenda”.
O importe medio da hipoteca concedida sitúase en 185.642 euros, cifra que representa un 85,12% do valor de tasación do inmoble e corresponde, na súa maioría, a hipotecas cun prazo de amortización de 40 anos. En relación aos préstamos hipotecarios solicitados, a evolución temporal mostra que no primeiro semestre deste ano, o importe medio aumentou en case un 8% en relación ao mesmo semestre de 2006, cando a hipoteca media estaba situada en 172.174 euros. As poboacións onde se concederon hipotecas de maior contía son Barcelona (270.031 euros), L’Hospitalet de Llobregat (240.112 euros) e Madrid (239.351 euros).
