Galicia podería sumarse a Cataluña e o País Vasco e cobrar un canon aos propietarios de vivendas baleiras. O presidente da Xunta, Emilio Pérez Touriño, anunciou onte que a idea se atopa en fase de consideración, “como permanentemente están outras iniciativas”. A súa intención sería esperar a ver o resultado desta medida noutras comunidades, e de obter un saldo positivo, o Goberno galego incluiría o gravame sobre as casas desocupadas na futura Lei da Vivenda, que está previsto inicie a súa tramitación parlamentaria no último terzo deste ano.
Teresa Táboas, responsable do departamento autonómico de Vivenda, di que “é moi pronto aínda” para saber se Galicia copiará a iniciativa de vascos e cataláns. Precisamente, fai menos dun mes o PP presentou unha pregunta parlamentaria dirixida a coñecer se a Xunta ía importar esta polémica medida pero aínda non obtivo resposta.
O tenente de alcalde de Urbanismo do Concello de Zaragoza, Antonio Gaspar, tamén se mostrou a favor de penalizar aos propietarios de pisos baleiros. Pero matizou que esta medida debería estar regulada por unha lei onde se precisase que se entende por vivenda baleira e debería abordarse en última instancia, é dicir, se non dan resultado os incentivos ao aluguer que, na súa opinión, deberían primar sobre as penalizacións.
Solbes pide cautela
Desde o Goberno central, o vicepresidente segundo e ministro de Economía, Pedro Solbes, indicou que unha penalización aos pisos baleiros tería “reducidos resultados”. Ao seu xuízo, “hai que ser moi cautos” antes de adoptar unha medida deste tipo porque “en termos xurídicos, expón bastantes problemas e, en termos económicos, cremos que ten un resultado relativamente reducido”.
Pola súa banda, o secretario de Estado de Facenda, Carlos Ocaña, considerou que un canon ás vivendas baleiras suporía “traspasar a liña vermella” e pediu “unha certa mesura” respecto diso porque “non ten sentido implantar impostos confiscatorios que fagan imposible a propiedade privada”.
