A partir de mañá todas as empresas dedicadas á construción deberán figurar no Rexistro de Empresas Acreditadas (REA) en cumprimento da Lei Reguladora da Subcontratación. A inscrición no REA será imprescindible para que as compañías poidan operar.
A finalidade última desta medida é reducir a alta sinistralidade do sector a través de acreditacións que garantan que quen finalmente se fan cargo da execución das obras cumpren a Lei de Prevención de Riscos Laborais. Deberán inscribirse todas as empresas e autónomos con traballadores dependentes que actúen como contratistas e subcontratistas en traballos de escavacións, movementos de terra, rehabilitacións, montaxes ou saneamentos.
A lexislación esixe ás empresas que dispoñan dunha estrutura e medios materiais suficientes para realizar os traballos e que formen aos seus traballadores en materia de seguridade e saúde laboral. De feito, para poder traballar, todo o persoal deberá acreditar antes do 1 de xaneiro de 2012 recibir un mínimo de oito horas de formación.
Listas intercomunicadas
O desenvolvemento do rexistro corresponde á autoridade laboral da autonomía onde estea domiciliada a empresa, o que retardou considerablemente a concreción da medida a pesar de que a Lei Reguladora da Subcontratación entrou en vigor en abril de 2007.
Deberán inscribirse todas as empresas e autónomos con traballadores dependentes
As listas de empresas acreditadas estarán intercomunicadas mediante a súa integración nunha base de datos deseñada e controlada polo Ministerio de Traballo e Inmigración, o que permitirá coñecer desde calquera punto de España se unha firma cumpre ou non coa normativa.
A tramitación do rexistro é exclusivamente telemática, é dicir, que a inscrición, variación de datos, renovación, cancelación ou expedición de certificados farase só a través da web dos distintos departamentos de emprego das comunidades ou do Ministerio de Traballo. Previamente, os usuarios deberán dispor dun certificado dixital.
Dilixencia e rapidez
A Federación Estatal de Construción, Madeira e Afíns de Comisións Obreiras (Fecoma-CC.OO.) instou ás empresas construtoras e ás administracións autonómicas a que sexan “diligentes” e actúen “rapidamente” na posta en marcha do rexistro.
Segundo o sindicato, as 17 comunidades e as cidades autónomas de Ceuta e Melilla constituíron “en tempo e forma” os seus respectivos rexistros. Lamenta, no entanto, o atraso no proceso de constitución de cada un deles, xa que moitas rexións “apuraron ao máximo o prazo previsto”, co que “moi poucas empresas puideron proceder á súa inscrición”.
As listas de empresas acreditadas estarán intercomunicadas mediante a súa integración nunha base de datos deseñada e controlada polo Ministerio de Traballo
Fecoma-CC.OO. cre que o rexistro de empresas será unha “magnífica ferramenta” para excluír do sector “aos falsos empresarios” e a aqueles que, aproveitando a actual situación económica, pretendan incumprir as leis e os convenios.
Na mesma liña, a Federación de Metal, Construción e Afíns de UXT (MCA-UXT) confía en que o novo rexistro saque do mercado a aquelas compañías que non respectan os mínimos que marca a normativa de prevención de riscos laborais.
Nun comunicado, o sindicato explicou que o obxectivo desta iniciativa é que todas as empresas que traballen nas obras, tanto contratistas como subcontratistas, aseguren a súa solvencia, organización e a formación do seu persoal, e que o sector “deixe de ser o que acumule as maiores taxas de accidentes laborais provocados por neglixencias” no cumprimento das medidas de seguridade.
