A ministra de Vivenda, María Antonia Trujillo, adiantou onte que o seu departamento fará público un informe sobre propiedade do chan no que quedarán identificados os “señores do ladrillo”. O denominado “Atlas Estatístico das Áreas Urbanas 2006” promete ser unha revolución.
E é que a inmensa maioría do terreo atractivo para o desenvolvemento urbanístico presente e futuro permanece en mans de moi poucos. Só en Madrid e as súas proximidades unha empresa controla case 11 millóns de metros cadrados (seis millóns en parcelas urbanas sen edificar e outro cinco en rústicas), segundo dixo Trujillo.
O obxectivo da titular de Vivenda é desenmascarar ás “persoas físicas e xurídicas” que controlan o chan. Trujillo matizou que non se detallarán nomes e apelidos, pois o impide a lexislación sobre protección de datos. Pero quedará ao descuberto o volume das súas propiedades.
Este atlas é froito dunha minuciosa investigación nos rexistros do Catastro de toda España, complementada cun programa europeo xa en marcha, denominado “Corine Land Cover”. Xunto ao dato de Madrid, Trujillo afirmou que na zona de Elxe-Alacante outra empresa é titular única de máis de cinco millóns de metros cadrados. Nesta rexión, apuntou, a poboación creceu un 6% entre 1987 e o ano 2000. Período no que o número de vivendas construídas aumentou un 26% e a superficie urbanizada, un 50%.
