O Rexistro da Propiedade puxo en marcha un novo servizo de atención ao usuario que atenderá en inglés as peticións realizadas por Internet dos cidadáns estranxeiros co obxectivo de axudarlles a investir no sector inmobiliario español. Este novo servizo comprende o máis de mil rexistros da propiedade distribuídos polo noso país, destacou o Ministerio de Fomento.
A través deste sistema en liña, o usuario estranxeiro pódese pór en contacto co Colexio de Rexistradores e formular a súa petición. Posteriormente, un grupo de expertos fará un seguimento desta petición ata enviar a nota simple requirida traducida ao inglés. Fomento sinalo que o sitio web se creou para axudar aos usuarios internacionais “a saltar as barreiras da terminoloxía xurídica española á hora de investir no sector inmobiliario en España e, desta forma, avaliar e interpretar correctamente a información emitida polas oficinas do rexistro da propiedade”.
Todos os conceptos xurídicos da nota informativa deberán interpretarse de conformidade coa lexislación vixente en España, e en caso de discrepancias respecto da tradución, prevalecerá a versión en español. Para facilitar o exame e a comparación do extracto orixinal e a súa tradución, a información preséntase nun formato de dobre columna nos dous idiomas.
A secretaria de Estado de Vivenda, Beatriz Corredor, asegurou que “desta forma, os cidadáns estranxeiros poderán dispor, de forma máis comprensible para eles, de toda a información sobre a situación física, xurídica e urbanística da vivenda que lles interesa, de maneira que calquera comprador poida acudir a este rexistro antes de adquirir un inmoble para comprobar que non hai ningún risco na operación”.
Pola súa banda, o decano-presidente de Colexio de Rexistradores de España, Alfonso Candau, sinalou que “con este novo servizo preténdese dar un paso máis no achegamento do Rexistro aos usuarios non residentes no noso país e contribuír á transparencia do mercado inmobiliario español fóra das nosas fronteiras”.
