O Ministerio de Vivenda pretende incentivar aos propietarios de pisos baleiros a sacalos ao mercado de aluguer ofrecéndolles seguros máis baratos. O medo a falta de pagamentos ou desfeitas fai que moitos propietarios se retraigan á hora de alugar as súas vivendas. Para ofrecer máis garantías e seguridade a estes futuros arrendadores, o Ministerio ideou o selo “Aluguer Seguro”.
Este produto, que foi presentado onte pola ministra Carme Chacón, permitirá aos propietarios contratar seguros multirrisco e pólizas de falta de pagamento e asistencia xurídica a través da Sociedade Pública de Aluguer (SPA) cun aforro do 70% e do 40%, respectivamente, en relación co prezo medio do mercado, segundo anunciou Chacón.
“Os propietarios piden máis seguridade e garantías e iso é o que pretende resolver o selo”, dixo a ministra. “O estímulo do aluguer é clave nun mercado da vivenda como o español, onde o arrendamento representa pouco máis do 10% total do mercado, mentres que nos países da contorna europea supón un 40% de media”, subliñou.
50 céntimos ao día
No caso do seguro multirrisco, para unha vivenda de 70 metros cadrados e unha renda de 7.200 euros anuais o aforro será duns 56 euros. Respecto da póliza de falta de pagamento e asistencia xurídica, se se contrata coa SPA o aforro será do 1,8% da renda anual, mentres que no mercado o custo é do 4,7%. Entre os dous seguros, que se contratarán de forma conxunta, o aforro medio para un propietario elévase por encima dun 50%, segundo o Ministerio.
Co novo servizo “os propietarios van ter cobertura por só uns 50 céntimos ao día. Este será o custo do selo ‘Aluguer Seguro’, coas dúas pólizas, para un aluguer medio de 7.200 euros anuais”, aseverou a ministra.
O seguro de falta de pagamento e asistencia xurídica que ofrece a SPA ten unha cobertura de 18 meses, mentres que no mercado “só se pode contratar por 12 meses”, afirma Vivenda. O pago ao propietario realizarase no primeiro mes da denuncia por morosidade, sen ter que esperar á sentenza xudicial.
