O Ministerio de Vivenda debe elevar ao Goberno antes do próximo 31 de xullo o proxecto para a constitución da Sociedade Pública de Aluguer como entidade prestadora de servizos, segundo unha resolución publicada onte no Boletín Oficial do Estado (BOE).
O obxectivo desta sociedade será axudar á promoción do mercado de aluguer, ofrecendo maiores garantías aos arrendadores e arrendatarios, achegando información e asesoramento, e facilitando a xestión de vivendas, ben sexan libres ou suxeitas a algún réxime de protección, co fin de aumentar a seguridade xurídica e reducir custos de transacción para os arrendadores particulares.
Así mesmo, desenvolverá fórmulas de colaboración coas administracións autonómica e local para realizar tarefas relacionadas co seu obxectivo social de promoción do mercado de aluguer no noso país.
Doutra banda, o Ministerio de Industria, Turismo e Comercio ten de prazo ata o próximo 1 de novembro para presentar á Comisión Delegada de Asuntos Económicos un plan de actuación en comercio interior que incremente a competencia nos mercados, mediante o aumento da transparencia e difusión da información sobre prezos e marxes da cadea de distribución, e do fomento da incorporación de novos operadores e a modernización das canles de distribución.
