Autoek ingurumena kutsatzen dute eta energia-gastu handia eragiten dute. Arrazoibide hori aipatu ere ez litzateke egin beharko, baina datu batzuek oso argi uzten dute emisio poluitzaileen arazoa, eta horiei buruz hausnartzea merezi du.
Berriki, World Watch ingurumen-aldizkariaren txosten baten arabera, karbono dioxidoaren (CO2) eta berotegi-efektua eragiten duten beste gas batzuen emisio kutsatzaileak %40,43 hazi ziren Espainian 1990etik 2003ra bitartean.
Garraiobideak dira, neurri handi batean, CO2 emisioen erantzule. Energia aurreztearekin duen erlazioa argia da: gure ibilgailuekin zenbat eta energia gehiago gastatu, orduan eta emisio poluitzaile gehiago egingo ditugu, eta erregai gehiago kontsumituko dugu eta diru gehiago gastatuko dugu.
Horregatik, garrantzitsua da zenbait neurri hartzea gure ibilgailuen energia-kontsumoa ahal den neurrian murrizteko; ingurumenak eta poltsikoek eskertuko dute.
Lehenik eta behin, beharrezkoa ez bada, ez dugu autoa erabili behar. Leku askotara joan gaitezke garraio publikoaren bidez edo oinez, batez ere hirigunean, batzuetan autoa erabiliz baino erosoago. Seguruenik denbora gutxiago beharko dugu, eta, hala, aparkatzeko arazoa saihestuko dugu.
Autoaren erabilera murrizteko beste modu bat gure lantokitik hurbil bizi den jendearekin geratzea da, lanera elkarrekin joateko, ibilgailuak txandaka partekatuz ahal diren plaza guztiak betetzeko eta, hartara, gidari bakoitza bere lantokira bere autoan joan ez dadin.
Bestalde, auto berri bat erosteko orduan, aurrezteko irizpideak hartu behar ditugu kontuan, hau da, ezer baino lehen finkatuko ditugu erregai-kontsumoan eta sortzen duen kutsaduran.
