O 50% das persoas con lesións medulares deben a súa enfermidade a un accidente de tráfico. Para concienciar aos condutores do perigo que supón a condución baixo os efectos do alcol, 110 voluntarios que permanecen prostrados en cadeiras de rodas acompañarán aos axentes nas probas de alcoholemia. Entre o 4 e o 17 de xuño realizaranse máis de 200.000 controis nas estradas.
Baixo a lema “Porque a única taxa segura para conducir é 0,0g/l. Elixe a túa razón e non bebas”, a Dirección Xeral de Tráfico (DXT) puxo en marcha unha campaña para previr este factor de risco. A Agrupación de Tráfico da Garda Civil aumentará ata 800 os puntos de control, de maneira que os axentes efectuarán 15.000 probas diarias de alcoholemia.
Segundo datos da Asociación de Parapléxicos e Grandes Discapacitados Físicos (Aspaym), un 85% dos lesionados medulares por accidentes de tráfico son novos entre 15 e 30 anos.
Os voluntarios en cadeiras de rodas repartiranse en grupos de cinco. Moitos deles serán vítimas de accidentes nos que estivo presente o consumo de alcol. “Queremos transmitir a idea de que mesturar alcol e velocidade é facer oposicións ao Hospital Nacional de Parapléxicos ou ás unidades especiais de lesións medulares. Non pretendemos atemorizar a ninguén, pero isto é a realidade”, sinala Alberto de Pinto, presidente de Aspaym.
Durante os días 1 e 2 de xuño os axentes farán controis de alcoholemia en Galicia, Asturias, Comunidade Valenciana, Madrid, Murcia e Canarias, xunto a persoas en cadeiras de rodas. “Non corras, non bebas, non cambies de rodas” é o slogan da iniciativa auspiciada polas asociacións de lesionados medulares. Nunha segunda fase, o 15 e o 16 de xuño, os asociados de Aspaym estarán presentes en controis situados en Toledo, Albacete, Conca, Sevilla, Baleares, Granada e Castela e León.
