O mes pasado foi o setembro máis cálido da historia desde que se coñecen datos, segundo informou onte a Administración Nacional Oceánica e Atmosférica de EE.UU. (NOAA, as súas siglas en inglés).
De media, a temperatura foi de 0,6 graos centígrados por encima do normal, polo que se trata do mes máis caloroso desde que se comezasen a rexistrar as temperaturas, alá polo ano 1880.
O segundo setembro máis cálido é agora o do ano 2003, cunha media de temperatura de 0,57 graos por encima do habitual.
Pola súa banda, en EE.UU. o citado mes foi o cuarto setembro máis cálido do que se ten coñecemento. A temperatura na nación norteamericana estivo 1,4 graos por encima da media.