Europar Batasuneko beste estatu batzuetatik datozen salgaien sarrera ez da inportaziotzat hartzen, baizik eta Europar Batasuneko trafikotzat, 1993ko urtarrilaren 1ean Europako Merkatu Bakarra indarrean sartu zenetik. Ordutik hona, nabarmen handitu da kontsumitzaileek Batasuneko beste herrialde batean ibilgailu bat erosteko duten interesa.
EBko herritarrek ohiko bizilekua duten estatuan matrikulatu behar dituzte beren ibilgailuak. Espainian, dagokion probintziako trafiko-buruzagitzak egiten du matrikulazio-eskaera. Ibilgailua behin betiko matrikulatzeko epea 60 egunekoa izanen da, herrialdean erabiltzen hasi eta hurrengo egunetik hasita. Epe horren barruan, IATko edozein estaziotan Espainiako fitxa teknikoa eska daiteke eta matrikula arrunta tramitatu.
Baina lehenago aldi baterako zirkulazio baimena eskatu behar da, hau da, plaka berdea, Espainiako fitxa teknikoa tramitatzen den bitartean zirkulatzeko aukera ematen duena. Nolanahi ere, ondoren behin betiko matrikula arrunta tramitatu behar da. Izapide horietarako guztietarako beharrezkoa da ibilgailua erosi dela frogatzea, haren legezko jabetza frogatzen duten agirien bidez.
Plaka berdeen aldi baterako zirkulazio baimena 60 egunekoa da, salbuespen gisa luzatzen ahal dena, eta behin betiko matrikulazioa tramitatzen den bitartean zirkulatzeko aukera ematen du. Behin-behineko matrikula horiek lortzeko, eskaera egin eta ezarritako tasak ordaindu behar dira. Gero, ibilgailuaren behin betiko zirkulazio baimena jasotzen denean, plaka berdeak aldi baterako baimenarekin batera itzuli beharko dira.
Aldi baterako zirkulazio-baimenaren eskaerari buruzko informazio gehiago nahi izanez gero, kontsultatu DGTren helbide hau: http://www.dgt.es/tramites/vehiculos/matnfue.htm.
