O pasado verán Google lanzou “A miña Conta“, un novo panel desde o cal controlar, protexer e revisar todos os datos que o popular buscador garda sobre cada usuario. Era un paso necesario ante a crecente preocupación sobre a cantidade de datos que Google almacena sobre os seus clientes e as dúbidas sobre o emprego que a empresa californiana podería facer deles. Con esta nova aplicación é máis fácil ser conscientes de toda a información que se facilita cando se utilizan os diferentes servizos de Google, xa que proporciona acceso directo ás opcións de configuración e ás ferramentas para protexer datos persoais e privacidade en liña. Neste artigo revélanse cales son as principais seccións do panel “A miña Conta” en Google e como usalas para protexer a privacidade dixital de cada persoa.
Como acceder ao panel A miña Conta en Google?
Para acceder a “A miña Conta” de Google, é necesario iniciar sesión coa dirección de correo e o contrasinal. No momento en que xa se está identificado, na páxina principal do buscador vese o avatar na esquina superior dereita; só hai que facer clic sobre el e, na xanela que se abre, clicar de novo sobre o botón azul “A miña conta”. Con isto abrirase a aplicación e todos os seus apartados.
O panel “A miña Conta” pode asustar un pouco ao principio, porque ofrece moitas opcións e ferramentas. Pero se un fíxase un pouco, verá que están organizadas de forma moi práctica en tres amplas seccións: Acceso e seguridade, Información persoal e privacidade e Preferencias da conta. A continuación analízanse con detalle.
Como controlar os accesos á conta de Google?
Ter controlados os dispositivos, aplicacións e sitios web que acceden á conta de Google é o primeiro paso para evitar accesos non autorizados. Neste primeiro apartado do panel “A miña Conta”, “Acceso e seguridade“, é posible revisar que dispositivos tiveron acceso á conta de Google, así como obter unha lista de todas as apps e servizos en liña que están conectados con ela, como poden ser os xogos de móbil nos que o usuario se identificase cos datos de Google. En caso de dúbida, pódese revogar o acceso de calquera destes dispositivos ou aplicacións á conta, facendo clic sobre calquera deles na lista.
Nesta sección pódese activar a verificación en dous pasos, establecer datos de recuperación (por se un día pérdese acceso á conta de Google) como un correo electrónico alternativo ou un número de teléfono e, o máis importante, facer unha verificación de seguridade que permite repasar a configuración actual e as actividades máis recentes para protexer a conta.
Google garda (case) todas as actividades dos seus usuarios
A sección “Información persoal e privacidade” é a que máis chama a atención cando se revisa a conta de Google. E é así porque nela se garda toda a información que o buscador ten de cada usuario, desde o máis sinxelo (a dirección de Gmail) ata o máis detallado: procuras en web, historial de localizacións, comandos por voz, vídeos reproducidos en Youtube, etc.
Toda esta información pódese revisar con facilidade desde esta opción e, ademais, cada un dos apartados pódese administrar por separado, configurando con exactitude como se queren xestionar estes datos e eliminando todas as entradas que se desexe deles. É importante resaltar, ademais, que só o propietario da conta ten acceso a esta información; é dicir, non é algo compartido publicamente que calquera poida ver en Internet.
Outras funcións destacables que se atopan dentro deste apartado son a posibilidade de crear un arquivo cos datos dos produtos e servizos de Google (e descargalo ao computador) e a de asignar un administrador da conta, para cando se deixe de utilizar por falecemento do titular.
Ademais, desde a subsección “Vista xeral da conta”, é posible repasar dunha ollada o uso dos diferentes produtos de Google: número de contactos, mensaxes en Gmail, documentos en Google Drive, aplicacións de Play Store instaladas, favoritos de Chrome sincronizados e moito máis.
Por último, neste apartado tamén hai un proceso de verificación que permite revisar a configuración de privacidade actual e modificala segundo as necesidades e preferencias do usuario.
Como configurar as preferencias da conta de Google?
A terceira e última sección do panel “A miña Conta” en Google, “Preferencias da conta“, é a máis sinxela. Está dedicada a diversas opcións de configuración como idioma, funcións de accesibilidade para persoas con necesidades de tecnoloxía de asistencia ou contratación de máis espazo para Google Drive.
Este é tamén o apartado desde o que se poden eliminar certos servizos individuais de Google ou mesmo suprimir a conta por completo. Convén lembrar que en caso de levar a cabo isto, desaparecen todos os datos, así que quizais interese descargalos como arquivo ao computador antes de facelo.
- Siga en Twitter á autora do artigo, Elena Santos @chicageek.
O panel “A miña Conta” de Google é unha medida de prevención activa contra posibles accesos non autorizados ou calquera outro problema de seguridade e privacidade en liña. É importante estar alerta ante calquera posible intento de engano, pero tamén é recomendable adiantarse e tomar as medidas oportunas mesmo antes de que pase nada.
Coa revisión da aplicación “A miña Conta” periodicamente e a comprobación de que apps e servizos web teñen acceso aos datos, así como ao facer as verificacións de seguridade e privacidade, é posible mellorar a seguridade en liña cando se usa Google ou algún dos seus servizos asociados.
