Zer da tempeh? Elikagai trinkoa da, eta Rhizopus lizuna soja-ale osoen gainean inokulatuz hartzitzen da. Produktua inkubatu egiten dute, eta horrek opil solido bat sortzen du. Inkubazioaren ondorioz, opilak zapore hobea du eta errazago digeritzen da.
Propietate elikagarriak Proteina-iturri interesgarria da (% 50 pisu lehorrean), eta funtsezko aminoazidoen osaera ona du; beraz, haragia kontsumitzeko alternatiba osasungarria da. Gatz mineralen (kaltzioa, fosforoa, burdina) eta bitaminen (tiamina, erriboflabina eta B12 bitamina) iturri garrantzitsua da. Azken hori ez dago landareetan, eta baliteke dieta begetarianoan defizitarioa izatea. Gainera, azido fitikoaren %30 inguru (lekale eta zerealen konposatua, kaltzioarekin, magnesioarekin, zinkarekin eta burdinarekin gatzak sortzen dituena eta xurgatzea eragozten duena) galdu egiten da hartziduran zehar. Nola sartu nire dietan?Plater nagusi gisa edo beste prestakin batzuetan osagai gisa kontsumi daiteke. Era berean, hainbat modutan erabil daiteke: erreta, frijitua, lurrunetan, erregosia, mikrouhin-labean, birrindua edo zopa batean sartua.
Non erosi eta zein dira kontserbatzeko baldintzak? Tempeh denda espezializatuetako elikagai hoztuen edo izoztuen atalean dago. Tempeh erosten duzunean, lehenik eta behin ziurtatu opila lotuta dagoela eta ez zati bereizietan. Gero, begiratu zigilua eta egoera onean dagoen. Ontziratuta eta zigilatuta badago, izozkailuan gorde daiteke zenbait hilabetez. Hala ere, ireki ondoren, hozkailuan fresko egon behar du, gehienez ere 2 astetik 3 astera.
