O Río Amarelo, o segundo máis longo de China, corre o perigo de secarse no seu curso medio, ao seu paso pola rexión de Mongolia Interior, polo que as autoridades do país adoptaron medidas de emerxencia.
Segundo Qiao Xixian, experto do Comité de Conservación do Río Amarelo, nos últimos días rexistrou o fluxo de auga máis baixo da súa historia ao seu paso por Mongolia Interior, e destacou que se tiveron que tomar medidas de protección no curso alto paira evitar que a canle se seque.
Mentres os ríos da outra gran conca hidrográfica de China, a do Yangtse, ameazan con desbordarse estes días debido ás choivas torrenciais, o Amarelo flúe a unha velocidade tres veces menor do nivel considerado alarmante.
Por iso, os expertos do Comité de Conservación traballan a contrarreloxo no tramo de Mongolia Interior, onde o río traza una curva de 180 graos, sorteando os desertos e terras áridas.
A pesar da seca que soporta a conca, os expertos advirten da posibilidade de inundacións nas próximas semanas, dado que se esperan fortes choivas torrenciais en xullo e en agosto no norte de China.
O Río Amarelo, onde naceu a civilización chinesa fai uns 5.000 anos, alterna períodos de seca con desbordamentos. Un exemplo do imprevisible que pode chegar a ser é o feito de que cambiou a súa desembocadura en decenas de ocasións.
Este inverno, o Amarelo ameazou cun novo desbordamento, xa que o frío conxelou máis de 1.200 quilómetros do seu curso baixo.
