O borrador do programa de investigación sobre cambio climático, anunciado polo presidente de EE.UU., George W. Bush, cando comunicou o seu rexeitamento á ratificación do Protocolo de Kioto alegando incertezas científicas, recibiu críticas moi fortes nun informe da Academia Nacional de Ciencias de Estados Unidos, solicitado pola propia Administración republicana. É a segunda vez en menos de dous anos que esa prestixiosa institución científica pon en evidencia ao Goberno de Bush nesta materia.
O máximo responsable deste programa de investigación, James Mahoney, sinalou o pasado mes de outubro en Washington que o obxectivo do plan é despexar as dúbidas sobre a posibilidade de que o quecemento global estea a cambiar o clima, xa que, ao seu xuízo, “non hai ningunha evidencia sólida”. Agora, tras revisar o borrador do programa, os dezasete especialistas da Academia de Ciencias conclúen que este carece da maioría dos elementos exixibles a un plan estratéxico e subliñan que os seus obxectivos non poderán alcanzarse sen unha inxección superior de fondos.
O informe elaborado por este grupo independente de especialistas é tan crítico co plan que insta a revisalo “substancialmente”. Paira empezar, precisa que deberían articularse con máis claridade todos os obxectivos, o que debería ir acompañado de mecanismos paira avaliar os progresos e un calendario preciso.
Resultados incertos
Segundo este panel, dirixido por Thomas E. Graedel, profesor de ecoloxía industrial na Universidade de Yale, moitas das actividades científicas incluídas neste plan, aínda que son importantes, probablemente non poderán producir os resultados desexados nun prazo de dous ou catro anos, como pretende a Administración Bush paira tomar decisións políticas e económicas relacionadas co quecemento do planeta.
O documento subliña que é moi necesario o desenvolvemento de modelos paira predicir o impacto a nivel rexional do cambio climático, posto que serán esenciais paira as autoridades locais de Estados Unidos. Por exemplo, as comunidades de rexións costeiras poderían necesitar a construción de barreiras no litoral paira facer fronte a una subida do nivel do mar.
Outra das críticas vertidas é que o borrador “ten serias lagoas cando expón a análise dos efectos do cambio climático nas poboacións e os ecosistemas”. Ademais, o comité engade que o plan perde “una oportunidade paira mellorar a cooperación con outros países na investigación do cambio climático” debido a que está demasiado enfocado en Estados Unidos e os seus problemas. O informe tamén recalca que o plan inclúe moi poucas actividades científicas a nivel internacional.
James Mahoney recoñeceu a dureza das críticas, pero declarou que os comentarios do informe son benvidos e algúns quedarán reflectidos no plan definitivo, que se presentará en abril próximo. No aspecto positivo desta análise, os expertos procedentes do mundo académico, a industria e de organizacións ambientais privadas destacan que o plan pode ser una sólida base paira novas iniciativas científicas relevantes e subliñan a énfase realizada na necesidade da investigación paira estudar este grave problema.
