Un xulgado de Sevilla condenou á compañía de telecomunicacións Jazztel a indemnizar a un usuario con 2.000 euros en concepto de danos “morais” por deixalo tres meses sen a liña telefónica nin o acceso a Internet que inicialmente solicitara. A compañía asumiu a sentenza e pagou a indemnización e os seus intereses.
A asociación de consumidores Facua explicou que o proceso xudicial foi iniciado por un dos seus socios, Luís R.A., quen en outubro de 2006 solicitou a Jazztel a portabilidade do seu número e un servizo de ADSL. A empresa tardou case un mes en solicitar a portabilidade ao anterior operador, e cando por fin culminou este paso, os erros de Jazztel na súa tramitación provocaron que o usuario quedase sen liña. Ao cabo de tres meses de espera, o usuario optou por solicitar a anulación do contrato e reclamar unha indemnización á compañía e, ante a negativa de Jazztel a aceptar a reclamación, o caso levou aos tribunais.
A sentenza sinala que a privación de liña telefónica e da posibilidade de contactarse a Internet durante tres meses constitúe para o usuario “unha incomodidade que o mesmo non estaba obrigado a soportar”, xa que “non estaba xustificada a falta de restauración do servizo”.
O auto tamén recoñece que aínda que se trata dun prexuízo “dificilmente mensurable”, isto non impide cuantificar economicamente a indemnización procedente. E considera que, “tendo en conta que o señor R.A. facía o uso persoal e doméstico que calquera particular fai da súa liña telefónica, procede prudencialmente cuantificar a indemnización ao seu favor en 2.000 euros máis os intereses legais desde a data de interposición da demanda”.
