Baliteke oporretan taxi zerbitzua kontratatu behar izatea garraiobidea uzten digun lekutik hotelera edo helmugako ostatura joateko. Zerbitzu honen tarifak hiri batetik bestera aldatzen diren arren, jakin behar dugu tarifa horiek araututa daudela eta nahitaez bete beharrekoak direla. Gainera, tarifen koadroak agerian egon behar du ibilgailuaren barruan.
Udalek eskumena dute tarifa-gaietan udalerri bereko ibilbideetan (hiri barruko ibilbideetan), eta, beraz, zerbitzu beraren prezioa herri batetik bestera alda daiteke.
Tarifek kontzeptu hauek izan ditzakete:
–“Bandera-jaitsiera”: zerbitzua hasteagatik adierazitako prezioa edo lasterketa bakoitzeko kobratzen den gutxieneko tarifa.
– Egindako kilometro bakoitzeko tarifa.
– Itxaron orduko tarifa.
–Gehigarri eta tarifa bereziak, hala nola aireportuak edo ekipaje soberakina.
Zerbitzua gauez edo jaiegunetan egiten bada, prezio handiagoa izan dezake.
Taximetroaren funtzionamendua, ibilbideko zenbat ordaindu behar dugun adierazten duena, egindako kilometro bakoitzeko tarifaren araberakoa da, edo itxaron orduko tarifaren araberakoa, inoiz ez biak batera. Ibilgailuaren abiadura “arraste-abiadura” baino txikiagoa bada (herri batetik bestera aldatzen da, tarifen arabera), taximetroak itxarote-orduaren prezioaren arabera funtzionatzen du. Hala ere, ibilgailuaren abiadura handiagoa denean arraste-abiadura, ibilitako kilometroaren prezioaren arabera funtzionatzen du.
Bestalde, erabiltzaile garen aldetik, ekipajea doan garraiatzeko eskubidea dugu, baldin eta lau plaza arteko ibilgailuek 50 kg baino gehiago ez badituzte eta ahalmen handiagoko ibilgailuek 60 kg baino gehiago, eta horien bolumenak maletategian sartzeko edo, halakorik badu, ibilgailuaren fardelean jartzeko aukera ematen badu, indarrean dauden trafikoko eta zirkulazioko araudiak bete gabe. Beren ezaugarriengatik ekipajea ibilgailuaren barruan eraman badezakegu eta eserleku kopuru osoa erabiltzen ez badugu, pisua 30 kg handitu ahal izango dugu jarleku huts bakoitzeko. Adierazitako marjinak gaindituz gero, tarifaren gehigarria aplikatu ahal izango da.
Taxi-gidariak zerbitzua emateari uko egin ahal izango dio zerbitzua legez kanpoko xedeetarako eskatzen denean eta/edo bidaiarien, gidariaren edo beste pertsona batzuen segurtasun edo osotasun fisikorako edo ibilgailuaren osotasunerako arriskua dagoenean.
Taxi-gidariak behar baino distantzia luzeagoak egin gabe eraman behar gaitu eskatutako helmugara, beste ibilbide bat egiteko eskatzen ez badugu behintzat, eta, jakina, emandako zerbitzuaren ordainagiria eskatzeko eskubidea dugu. Taxiaren ordainagirian, taxilariari buruzko datu guztiak aurkituko ditugu: lizentzia zenbakia, IFZ, ibilgailuaren matrikula, lasterketaren prezioa, zerbitzuaren data eta taxilariaren sinadura. Informazio hori oso baliagarria izango zaigu objekturen bat ahaztuz gero.
