Ter unha escaleira no interior dun fogar, se ocupa moito sitio, pode expor un inconveniente. Na actualidade, coas vivendas cada vez máis pequenas, ten moito valor atopar alternativas coas que sacar o máximo partido ás superficies dispoñibles, sen que iso supoña perder comodidade. Este artigo describe modelos e posibilidades de escaleiras de caracol, que son as máis apropiadas para aproveitar espazos reducidos, así como outros modelos innovadores, minimalistas e orixinais.
Nas casas con máis dunha planta, a necesidade dunha escaleira que as comunique pode representar un problema, pero tamén unha oportunidade. Pódese pensar nunha escaleira que ocupe o menor espazo posible, sen renunciar nin a estilo nin a elegancia.
Escaleiras de caracol, para aproveitar o espazo
As escaleiras que menos espazo utilizan son as escaleiras de caracol. A miúdo, a superficie que requiren non excede os dous metros cadrados. Polo xeral, procúrase que estas escaleiras se sitúen nunha esquina das estancias, pero isto non sempre é posible. En calquera caso, existen modelos de escaleiras de caracol moi prácticos e mesmo decorativos.
Nesta foto obsérvase unha escaleira de caracol clásica, elegante e discreta que ocupa un espazo medio. Ademais, non está nunha esquina, polo cal é unha escaleira adecuada para salas e casas espazosas, onde a falta de sitio non é un problema importante.
Estoutra imaxe, pola súa banda, representa o caso oposto: unha escaleira que ocupa a superficie mínima e indispensable. A clave deste deseño é o seu eixo inclinado, que permite maximizar o aproveitamento do espazo de ao redor. A firma holandesa que patentou esta escaleira, eeStairs, defínea como “unha solución artística a un problema práctico”.
Un exemplo de escaleira de caracol minimalista é o da casa que a empresa Suppose Design Office desenvolveu na cidade de Nagoya (Xapón). Non ten máis que o caño vertical que conforma o eixo, unha varanda e os chanzos, todo con liñas simples e rectas e en cor branca. Esta escaleira ten a particularidade, ademais, de estar a pé de rúa, xunto á mesma beirarrúa.
Innovación e orixinalidade en escaleiras
Existe tamén outros deseños moi modernos de escaleiras que non son de tipo caracol pero que tamén ocupan moi pouco espazo. O modelo Mini, da empresa MisterStep, permite salvar importantes desniveis en moi pouca superficie e con moito estilo.
Unha gran innovación para aproveitar o espazo nas escaleiras é o deseño de chanzos específicos para cada paso
Unha gran innovación en relación con escaleiras de pouco tamaño é o deseño de chanzos diferentes para cada paso. En lugar de ser rectangulares, se intercalan banzos que teñen un dos seus lados máis anchos; é dicir, hai un banzo deseñado de maneira específica para pisar co pé dereito, o seguinte é para o esquerdo, a continuación de novo para o dereito, e así sucesivamente. Deste xeito, as escaleiras poden ser máis empinadas sen perder superficie de pisada nin, por tanto, seguridade. Nesta ligazón ven imaxes deste deseño.
A empresa británica Levitate desenvolveu un modelo que é como un soño cumprido para os amantes da lectura: unha escaleira que é, ao mesmo tempo, un andel para libros. O concepto é moi simple: as mesmas táboas onde se apoian os libros deixan un espazo descuberto de tal forma que se poida usar como chanzo. O proxecto, chamado Bookcase Staircase (“escaleira-biblioteca”), pódese apreciar nesta web.
Se se fala de escaleiras minimalistas, unha das máximas expresións son sen dúbida os modelos consistentes en banzos encaixados na parede e con mínimo contacto entre si, como os que ven nesta foto.
Con todo, o punto máximo de minimalismo e aproveitamento do espazo é probable que sexa a “escaleira de parede” deseñada polo estadounidense Aaron Tang. Como se observa nas imaxes, neste modelo víranse os chanzos cara arriba e a viga que os sostén desprázase cara á parede. Dese modo, a escaleira desaparece virtualmente e o espazo que ocupa é igual a cero. Cando fai falta de novo, a escaleira desprégase e volve estar dispoñible para subir á planta de arriba.
