A última publicación sobre “Papeis da Economía Española” da Fundación das Caixas de Aforro (FUNCAS) sinala que o parque de vivendas baleiras en España creceu un 25,48% no último decenio, ata situarse en 3,01 millóns de unidades en 2001, mentres que a cifra de casas secundarias aumentou un 14,95%, con 3,36 millóns de pisos.
FUNCAS sinala que a maioría dos pisos baleiros, un 41,2%, atópase nas principais cidades españolas e as súas coroas metropolitanas, mentres que as vivendas secundarias concéntranse nos municipios de menor tamaño, un 53,9%, e nas costas turísticas.
Barcelona e Madrid son as cidades con maior proporción de tipos de vivendas baleiras no parque nacional, ao representar o 9,9% cada unha, mentres que en Valencia e Alacante esa porcentaxe descende ao 6,7% e 5,6%, respectivamente, e en Sevilla e Málaga ao 3,6% e 3,5%.
Pola súa banda, as vivendas secundarias concéntranse principalmente en Alacante, o 8,4% do mercado nacional, mentres que Madrid acapara o 8,2%, Valencia o 5,9%, Barcelona o 5,8%, e Málaga e Tarragona o 4,8% e 4,4%, respectivamente.
Doutra banda, FUNCAS sinala que o 18,5% das vivendas baleiras do parque español non está en bo estado e sitúa a idade media dos pisos en 38,7 anos. Así, indica que as proporcións das diferentes provincias van desde o 13,3% de Madrid, ao 30% ou 35% en provincias como Soria, Ávila, Teruel ou Burgos.
Segundo explica FUNCAS, nas provincias menos dinámicas os parques de vivendas baleiras son máis antigos, mentres que entre as provincias máis dinámicas é menor a media de idade dos pisos e é maior a proporción da construción no último decenio. Por iso, as vivendas secundarias e en maior medida as baleiras poderían chegar a ser utilizadas como casas principais ou permanentes.
